沙塵

父親節...

.

亞叔召集了洪興社一班古惑仔到他的禮拜堂聽講道。

「各位兄弟，想當年細個時，我顧住踢波，荒廢學業。後來仲入埋黑社會，激到老豆攤攤腰！後來我悔改噃，仲寫咗封信俾老豆…嗱，俾嗰封信你哋睇吖！」

.

亞叔走下來，每人派一份影印本的《給爸爸的信》。

「唔係呀嘛？！幾十年前寫幾個字俾自己老豆都會留定底？」 蕉皮對手上這份影印本有點懷疑，輕聲向身旁的包皮說。

「結果今日，我老豆三個仔女都學有所成。我老豆好偉大呀！」

台下一片掌聲。

「好嘞，大家都知細細粒嗰次撞親個頭，失咗憶。浩南騰晒雞，全靠我幫佢祈禱醫治，而家好番好多啦！所以今年父親節，佢送咗張卡俾我…」

.

亞叔於是把細細粒送給他的父親節卡朗誦出來。

「駛唔駛呀？咁娘炳。」山雞喃喃自語。

「輪到講我細仔啦！」亞叔愈講愈興奮。

「大家梗係話我成日吹水，講自己個仔幾乖幾叻，但係我又真係教得佢幾乖幾叻噃…」

.

亞叔邊講邊放出小兒子拿著習作簿影的相片給大家欣賞。

「呢度唔係禮拜堂咩，點解唔係講耶穌既？」浩南問細細粒。

「唔、唔、唔知、知道點、點解呢？」細細粒一急，老毛病又跑出來。

亞叔看見時間不早，是時候結束「講道」了…

「最後！等我讀埋我個女淑芬張卡俾你哋聽。」

淑芬寫的是英文。亞叔逐句讀，逐句翻譯給台下聽眾..

「結尾淑芬話 wish me more humble，祝我謙卑啲喎。」

亞叔擠滿了笑容問大家：「乜我好沙塵既咩？」

「係呀！你好沙塵呀！」
台下轟然回應。

《本故事純屬虛構，如有雷同實屬巧合》