選擇

計劃了下星期去美國探訪朋友，想買一些牛肉乾做手信。

記得在 Fraser 夾二十六街，有一家名叫《美X香》的「星加坡牛肉乾」專賣店。店內有燒烤爐，現燒現賣，口碑不錯。
.
於是，今日專程走了一趟。

入到《美X香》，訝然發覺內無一人，擺設亂七八糟，燒烤爐早就塵封，陳列櫃中空空如也！

.

心想：莫非走錯地方，還是這裡早成吉店？

正要離開的時候，廚房有一位女士走出來打招呼。

道明來意，議好價錢，要了總共兩公斤各式牛肉乾。

我告訴這位店員：「係要嚟送禮用既，請分開八小包，獨立真空包裝。」

過了一會兒，店員從廚房拿出八包牛肉乾給我。

「咦，點解包包既標貼都印住『豬肉鬆』既？」

我發覺八包牛肉乾的標貼都弄錯了！

「你睇得出唔係豬肉鬆咪得囉！重要既係有我哋《美X香》既嘜頭吖嘛。」

這位女士堅守著她的原則。

「但係我係要嚟送禮既噃...」

話猶未了，廚房走出另外一個女人，用更權威的聲音對我說：

「我哋本來係要用嗰啲標貼同膠袋嚟裝豬肉鬆既，不過個柯打取消咗。咁冇理由嘥咗佢哋吖，你知裡面係乜咪得囉！」

我還在咀嚼著這個女人的說話，嘗試消化她的道理時，她又開腔：

「咁你要，定唔要吖？！」

我沒有再出聲，用腳步作出了我的選擇。